Հոդված

Նախագծերի իրագործումը երկարացված օրվա ժամերին

Նախագծերի մեթոդն ունի մի շարք առավելություններ: Այս մեթոդով աշխատելիս զարգանում են ինքնագնահատման կարողությունն ու միասին աշխատելու հմտությունը, փոխօգնության պատրաստակամությունը, բանավիճելու ունակությունը, սեփական կարծիքի արտահայտման հաստատակամությունն ու խոսքի հիմնավորումը:​

Աշխատում եմ առաջին դասարաններում՝ որպես երկարացված օրվա կազմակերպիչ: Վերջին տարիներին աշխատել եմ մեծերի հետ և թվում էր՝ դժվար է լինելու աշխատել փոքրերի հետ, բայց ինձ օգնեց մի քանի տարի նախակրթարանում  տարիների իմ աշխատանքը: Սիրում եմ ստեղծագործել, ստեղծել,  հորինել. սիրում եմ այն ամենը՝ ինչ ստեղծվում է իմ ձեռքերով: Կամա, թե ակամա աշխատանքներս վերածվել են նախագծերի: Ամեն մի նախագիծ մի հաղորդում է՝ TV հաղորդում, որտեղ երեխաներն են թե՛ ռեժիսորը, թե՛ հաղորդում վարողները, թե՛ ստեղծողներն ու իրագործողները:Այս ուսումնական  տարվա առաջին աշխատանքս «Բուրատինոն» է: Եռանկյունաչափական պատկերներով ստացել ենք Բուրատինոյին /հեքիաթ+մաթեմատիկա+երգ+պար+տեխնոլոգիա/:  Երկրորդ աշխատանքը «Շունը» բանաստեղծության ուսուցումն է նախակրթարանում՝ փոքրերի հետ. և՛սովորում էինք, և՛սովորեցնում: Հաճախ ենք համագործակցում նախակրթարանի հետ. օգնում փոքրերին՝ «Մեր ուրախ առօրյան»: «Արեգակը դուրս է եկել պսպղալով»… Խաղ-թատրոն, բեմականացում,կերպարանափոխություն, կերպարների ստեղծում տարբեր նյութերից: Օգնում է երեխաներին բահաստեղծությունը հասկանալի, հետաքրքիր լինելուն, ավելի հեշտ ու պատկերավոր սովորել բանաստեղծությունը: «Տեսեք՝ ինչեր ենք պատրաստում» և «Մեր մոլորակները» նյութերը պատմում են մոլորակների ստեղծման մասին:

Ստորև բերում եմ նախագծային մի օրինակ՝

                                   Ծեփամածուկից՝ խճանկար

/նախագիծ/

Նպատակը՝

Սովորականից՝  անսովոր  /ստեղծական հրճվանք/

Խնդիրները՝

  

    

·                         Սովորողի երևակայության զարգացում

·                              Մատների մոտորիկայի զարգացում

Լավ է, թե վատ, թե ինչ պետք է անեմ, շատ բան նախօրոք չեմ նախատեսում:    Ծնվում է խմբում՝ գործունեության ընթացքում, սաների արածից, գործունեության արդյունքից:

Ծեփամածուկը (խմորը, կավը, ցեխը) երեխաների սիրած նյութն է, դրանով աշխատելը մի շարք ուսումնական խնդիրներ է լուծում:
Տեխնոլոգիական աշխատանքները երկարացված օրվա գործունեության նախընտրելի ձևերից մեկն է: Եվ այսպես՝   սկսեցինք:

1-ին փուլ

Մտածեցինք ծեփամածուկով աշխատել, բայց ինչ ծեփամածուկ, որտեղից: Որոշեցինք ինքներս պատրաստել. անհրաժեշտ էր ունենալ ալյուր, ջուր և սննդային գույներ: Երեխաների սիրած գործը. արդեն այդ փորձն ունեինք՝ թաթախվել ալյուրի մեջ, խաղալ խմորով: Երեխաների ուրախությունը պիտի տեսնել:  Զարմանալի ու հետաքրքիր են աշխատանքի բոլոր փուլերը, բայց գուավոր խմոր ստանալու գործընթացը ամենաոգևորիչն է: Ուրախ բացականչություններով են ուղեկցվում ամեն մի նոր գույն ստանալը. իսկական  կախարդական գույներ: Լցնում էինք մի գույն, ստացվում էր այլ գույն: Խմորը ստացվեց՝ կանաչ, դեղին, կարմիր, վարդագույն, շագանակագույն...

2-րդ փուլ

Սկսեցինք մանր գնդիկներ պատրաստել բոլոր գույներից: Թվում էր՝ երեխաները կձանձրանան, բայց անհամբեր սպասում էին, թե այդ   ինչ կախարդական գույնով են աշխատելու:  Գնդիկները պատրաստվեցինք: Պատրաստի գնդիկները պետք է չորացնեինք, հետևեինք, որ չկպչեն իրար: Ամեն գնդից ստացվում էր մոտ երեք մեծ սկուտեղ՝ լի գնդիկներով: Այս աշխատանքը պահանջեց 5 օր:

3-րդ փուլ

Գնդիկները պատրաստեցինք. հիմա ինչ անենք: Որոշեցինք մեծ փազլ պատրաստել: Մտածեցինք մի մեծ նկար պատրաստել: Բայց երեխաները իրենց անհատական նկարն էին ուզում: Որոշեցինք նկար -խճանկար հավաքել: Մեծ թուղթը բաժանեցի խճանկարի  փոքր մասերի, և յուրաքանչյուրն ունեցավ իր կտորը: Ասեմ, որ երեխաները հավաքել են իրենց ուզած պատկեր- նկարը, աշխատել են բոլոր գույներով: Աշխատում էին մեծ հաճույքով ու ոգևորվածությամբ, կային երեխաներ, որ ունեն մեկից ավել աշխատանքներ:  Բոլորն են մասնակցել: Ամեն կտորի աշխատանքը պահանջեց երկուսից երեք օր:

4-րդ փուլ

Բոլոր մասերը վերջացնելուց հետո վերջապես հավաքեցինք մեր խճանկարը: Ու ինչ ստացվեց. շատ զարմանալի մի բան՝ մի սիրուն, ամբողջական, բազմագույն, ուրախ կտավ-փազլ: Այն նաև լավ նվեր կարող է դառնալ:
Կարելի է խոսել այս աշխատանքի մանկավարժական-ուսումնական արդյունքների մասին: Բայց կարելի է և ավելի դիպուկ ու հակիրճ ասել՝ ստեղծագործական-ստեղծական աշխատանք, որը սովորողները սիրով և ոգևորությամբ արեցին: